政情：KK自稱比鐵頭仁優勝
泛民主派喺特首選舉委員會選舉大勝，豪取逾二百席，肯定夠票支持一人入閘，至於最後會提名邊個，就有待下月初嘅泛民特首初選結果。被指肯定連泛民初選都過唔到關嘅民協立法會議員馮檢基（KK），尋日就喺電台大晒自己有十多年同中央商討政改嘅經驗，比泛民初選對手民主黨何俊仁（鐵頭仁）優勝。連咁都可以用嚟做政績，難怪佢宣布參選時畀人民力量成員狙擊喇。
KK早喺回歸前已經提倡同中央「又傾又砌」，仲唔理民意反對接受中央委任做臨時立法會議員，畀其他泛民唾棄，最後佢爭取到啲乜，真係得佢先至知。KK之後繼續堅持同中央溝通嘅路線，但對方一直冇騷佢，直至去年政改連民主黨都加入埋「又傾又砌」行列時，中央先肯首次正式同泛民坐低一齊傾。如果呢樣嘢都真係算政績，咁睇怕鐵頭仁嘅功勞大過佢喇！