政情:新立會嘥錢 改大「狗窿」

立法會新大樓運作咗兩個月有多,執漏工程仍然每日不停咁進行,只係工人要喺辦公時間後先至開工,所以大家無乜機會見到。政府總部建築群以「門常開、地常綠、天復藍、民永繫」為主題,係咪名副其實真係見仁見智,就好似立法會面向維港嘅公眾入口通道,一直被批評好似隧道入口或狗窿咁,毫無大體可言,嘈嘈吓,立法會終於狠下決心順應尊貴議員嘅意見,改建挖大啲個狗窿。

如果市民由正門進入立法會新大樓,不難發現進入玻璃門後,就會見到灰蒙蒙一大幅牆,呢幅牆足足有成兩層樓咁高,而喺牆下中間位置,有一個四四方方嘅入口。老實講,身在其中確實有幾分似隧道入口,衰啲講句形容呢個係狗窿亦不為過,以中國人嘅傳統,捐狗窿無疑係自貶身價,如今立法會整個狗窿畀市民出入新大樓,係咪想貶低廣大市民先?

設計原意 議員唔Buy

其實根據設計新大樓嘅建築師嚴迅奇原先嘅想法,呢個入口正正係想畀人一種豁然開朗嘅感覺,所以先至會做到外面睇落去就好細,入到去先發現好大嘅感覺。不過,設計呢家嘢,真係好主觀,事關行到入去真係好有壓迫感,就連部分議員都睇唔過眼,彈呢個設計一文不值,要拆之而後快。

面對連串批評,立法會行政管理委員會尋日終於有個決定,要求嚴迅奇搞搞呢個入口,至於點搞法?行管會將個波交番畀嚴迅奇,要求重新提交一份設計畀立法會考慮,當中要使幾多錢就仲係未知數。不過,搞親改建,唔使上百萬都要以十萬計啦,值唔值真係見仁見智,但最終會改成點大家可以剝定花生等睇戲。

除咗要改大個狗窿外,立法會大樓內嘅空調同照明節能系統太高科技,喺控制方面搞到議員及議員助理頭都大埋,所以建築署稍後會到立法會舉行兩場簡介會,教大家使用新大樓嘅屋宇裝備。話時話,新大樓嘅執漏搞到明年立法會改選都未必搞得掂,話唔定改選後嘅新一批議員又有嘢睇唔順眼,咁執漏工程真係無日無之。

第一手消息請下載on.cc東方互動iPhone / iPad / Android Apps
Money18免費即秒股票報價網站現推出8升級功能,財經資訊,實時實發!