中環出更：梁廣灝揀領呔撐香港製造
工程師出身嘅能源諮詢委員會主席梁廣灝（Edmund）經常忙到飛起，日前佢現身理工大學一個活動，難得唔使趕出趕入，卓妮見佢精心配搭咗一條色澤鮮艷嘅詩閣（Ascot Chang）領呔，令人眼前一亮。原來佢係呢個頂尖度身訂造香港名牌嘅擁躉，已經捧場近廿年。
恤衫襟着質地好
Edmund話，佢幫襯詩閣做恤衫好多年，依家屋企衣櫃大部分恤衫都係詩閣出品，不過咁啱當日着住嘅恤衫唔係。佢咁捧場原因有二，一來佢哋嘅恤衫真係襟着，質地又好，二來佢係香港品牌，梗要鼎力支持喇。所以如果佢去訂造恤衫時，就會揀埋領呔。佢盛讚詩閣領呔價錢相宜，正價都唔使一千蚊，減價時去買就仲抵，難怪佢咁多年嚟對佢不離不棄。
不過Edmund好客氣咁話，佢經常要落地盤，所以着衫好求其。咦？點解要落地盤？係喎！差啲唔記得佢嘅正職係上市公司新昌營造董事總經理添！