中環出更：林玉茵外柔內剛似媽咪
社交圈中，林玉茵（Maya）與媽媽保良局副主席梁寶珠十足兩姊妹，每次去Ball，總係秤不離砣，首飾、手袋交換用，就連心事，也互通心靈，而媽咪嘅堅強，更感動了Maya。幾年前，佢哋喺緬甸嘅製衣廠遇上龍捲風，化為烏有，Maya同媽媽合力重建廠房，前後僅花了兩星期，合拍程度可想而知。
嬌滴滴嘅Maya，近年活躍各大青年團體，雖然係富二代，卻沒有千金小姐嘅「公主病」，仲堅持身兼兩職。平日擔任著名品牌卡地亞高級珠寶部總監，放工後主動幫手打理家族時裝生意，日睡只有五小時。這股衝勁，原來多得媽媽特訓。
難忘龍捲風毀緬廠房
Maya猶記得，幾年前龍捲風侵襲緬甸，十分鐘內將廠房夷為平地：「媽媽接到消息後，冇喊到，亦冇驚慌，反而第一時間問有冇員工受傷。」確認冇傷亡後，Maya第一個飛到緬甸做先頭部隊，媽媽則留守香港，指揮若定，兩星期後，兩人已另覓新址重建廠房。龍捲風也不怕，是何來的勇氣？寶珠姐淡然地笑一笑：「事情既已發生，應該向前望，只顧嘆息都沒用。」
Maya遺傳咗媽媽嘅不倒翁性格，中學留學美國時，迷上騎馬跳欄，有次練習，不幸摔倒地上，頭部着地，媽媽一度擔心會毀容。留院兩個多星期，Maya帶住頸箍出院，並出席中學畢業禮。未幾，Maya更重新跳上馬，至今仍堅持每星期到上水雙魚河學校騎馬，一展英姿。Maya話：「人生如騎馬一樣，就算跌倒，都唔可以逃避，一定要企番起身。」
卓妮