譚香文因為喺立法會選舉前為會計界人士搞講座，搞到被人告佢涉嫌賄選，最終法庭判佢無罪，但被廉署查都已經夠麻煩。選舉前搞活動真係好易會踩界，但香港會計師公會就好似無吸取教訓，原本仲諗住聽日搞個論壇，結果連選舉管理委員會都話，好似唔係咁好喎！
香港會計師公會遲啲會改選理事會理事，破天荒諗住喺聽日搞個理事會改選論壇，邀請公會約二萬五千名會員出席，等佢哋可以聽下候選人嘅政綱。但係論壇嘅主席，同埋超過一半嘅理事候選人好巧合地都係今屆嘅特首選舉會計界選委候選人，而出席論壇嘅會員亦都係選委嘅投票人，有會計界選委候選人就質疑安排偏頗個別選委候選人。
選管會就話，會計師公會嘅做法值得商榷，公會應該避免搞啲會令個別候選人有利嘅活動。聽講會計師公會收到選管會建議後都考慮緊延期，其實特首選委喺十日後就會投票，會計師公會等多幾日先搞個論壇，又有咩所謂呢？