政情：史泰祖終於動工拆違建
新民黨副主席史泰祖被踢爆佢喺上水嘅二萬三千平方呎園林別墅天倫小築涉霸佔官地同違規改建別墅後，地政總署限令糾正違規建築嘅期限尋日屆滿。史泰祖話，工人尋日已展開清拆大行動，違規興建嘅泳池亦會填平改作種植地，佔用嘅官地亦會歸還政府。
我哋尋日去天倫小築，見到史泰祖啱啱同工人傾緊工程應該點做，原先嘅泳池已抽乾水，用帆布遮住，泳池旁邊堆放咗建築物料。史泰祖話，工程尋日開始，預計需時約十日，包括拆去現有嘅三間屋同填平泳池，「總之以後嗰度就唔會有任何屋同泳池！」
佢話，天倫小築二萬三千平方呎用地中，一萬六千平方呎嘅私家地會保留嚟做園藝，其餘七千平方呎官地會歸還政府。佢又解釋話因為牌照屋政策較複雜，所以至發生今次錯誤，佢喺知悉事件後已即時糾正。地政總署發言人就話，去天倫小築視察後，發現工人正進行拆卸工程，該署會就實際情況諮詢法律意見，再決定下一步行動。