政情：何君堯請纓幫鄉紳出頭
特首選舉委員會選舉暗戰連場，多個傳統自動當選嘅界別都傾唔掂數爭崩頭，好似鄉議局界別就有三十人爭廿八席，其中有份參選嘅屯門鄉事委員會主席何君堯，就有傳會被鄉紳踢出局。咁啱得咁蹺，何君堯近期頻頻出招冧鄉紳，除咗幫手研究鄉委會章程外，連日前鄉紳火燒發展局局長林鄭月娥紙紮公仔嘅抗議活動都有撐場，好似最近熱爆嘅台灣電影主角咁保家衞國，莫非想爭取鄉紳支持？
眾所周知，身兼律師會會長嘅何君堯喺今年初同「新界王」劉皇發唱反調同拗手瓜，之後佢都有搵發叔飲茶陪罪，但政圈盛傳發叔親信打算要向何君堯還以顏色，全面封殺佢做選委，但何君堯亦絕非省油燈，立即有所行動。
據聞佢見到港府就鄉委會修章一事一拖再拖，於是喺上周鄉議局內部會議中突然自動獻身，拍晒心口話幫廿七個鄉委會從法律角度研究各鄉嘅章程問題。
現身「火燒林鄭」活動
及至剛過去嘅星期一，一班鄉紳因不滿林鄭月娥繞過鄉議局強硬執法取締新界村屋僭建問題，喺鄉議局大樓外空地焚燒林鄭嘅紙紮公仔以示不滿，當時何君堯都有出席撐場。
如果大家記得，何君堯之前講過村屋僭建問題，大原則係要依法辦事，尤其係要取締有即時危險嘅僭建物，如今佢去撐場，就好難唔令人覺得佢另有原因呢。
究竟何君堯突然「親鄉紳」所為何事？莫非真係同佢想爭取支持做選委有關？我哋尋日問過何君堯，佢就強調同選委選舉完全無關，又話鄉民焚燒單張，村民有村民嘅憤怒，而佢就有法律理據去做，反建議當局應修訂《建築物條例》中「僭建」嘅定義，並將僭建申報制度納入法例一部分，否則應該考慮提出私人條例草案解決問題喎。