政情：范太：雙英都唔蠢
下定決心退出特首爭奪戰嘅全國人大常委范徐麗泰，近日以旁觀者身份觀看特首選戰。尋日佢出席一個活動時，再被傳媒追問佢點睇唐英年同梁振英（CY）對壘嘅問題，佢巧妙地話兩個人參選係好事，又話「雙英」亦唔係蠢人。不過，范太覺得CY嘅口號未能畀到佢信心，莫非佢想暗示自己都係傾向支持唐唐多啲？
未決定挺唐定挺梁
范太曾經講過，唐唐係佢可以接受嘅特首人選，但尋日佢就話暫時未決定挺唐定挺梁，一切要睇兩人嘅政綱同點樣落實，同時亦會考慮兩人嘅個人能力及組織嘅班底如何。已經宣布參選嘅CY，以「穩中求變」為競選口號，范太聽完之後點評話，呢句口號暫時畀唔到佢信心，事關都唔知道會係點變，仲話承諾呢家嘢可以好好聽，如果兌現唔到只會係空話。至於坊間比喻唐唐對CY等於豬、狼對決，范太就覺得其實兩個都唔係蠢人喎。