中環出更：希慎賀上市30周年星光熠熠
尋日傍晚唔少中環名人齊集銅鑼灣希慎道利園，皆因出席希慎興業上市三十周年慶祝酒會，利氏家族與唔少希慎股東、社會領袖、商業夥伴齊齊見證歷史時刻，星光熠熠，非常熱鬧。
希慎主席利蘊蓮以一身高貴純黑行政套裝示人，聯同行政總裁嚴磊輝四圍招呼賓客。
利氏家族人氣鼎盛，利孝和夫人、細女利蘊珍同丈夫九巴後人雷禮權（William），仲有堂親、馬會大董利子厚及胞妹利子潔等都有現身撐場。
白金級廣場夏季開幕
政商界名人就有無綫「六嬸」方逸華及梁乃鵬、醫管局主席胡定旭、莎莎老闆郭少明伉儷等都有嚟湊熱鬧。William一反平日扮嘢慣例，執得好四正，原來佢跟住要去飲朋友餐喜酒。
利蘊蓮話，公司下一個重點項目係明年夏季開幕嘅希慎廣場，係首幢獲美國綠色建築協會LEED「白金級」水平嘅建築。廣場設有通風洞口及空中花園。嚴磊輝就話，廣場現時已逾七成租用率，商戶將會以成熟女士為主要對象，佢仲話，公司下一步將會翻新利舞台，預料需時十八個月喎。
卓妮