政情：kk未選特首先「凸手」

kk三年前跣倒跌親隻右手，之後一直感到痠痛，咩骨醫、針灸、跌打、推拿都試過，先後睇咗十四個醫生都搞唔掂，喺區選中戰勝工聯會對手後落區謝票時，更發現膊頭有舊嘢凸起咗，起初仲以為生癌，後來睇骨醫先知係整親舊患，嚟緊兩個月都要戴住個手托，連夾餸、沖涼都要搵太太幫忙，佢話從來未試過有咁優厚嘅待遇。

問及今次傷勢會唔會影響佢選特首嘅大計？kk就話︰「天將降大任於斯人也，必先苦其心志，勞其筋骨。」真係好有自信。咁啱工聯會議員葉偉明行過，kk即刻埋怨︰「都係拜你哋啲會員係咁派傳單所賜！」葉偉明就扮晒同情咁話，希望kk快啲好番，遲啲大家喺選舉中再打過。