中環出更：陳智思洪為民男人40典範
鼓勵港人發放正能量嘅40+協會，前晚選出多位四十歲以上嘅成功典範。城中多位名人獲獎，前行會成員陳智思（Bernard）及菁英會主席洪為民（Witman）等人齊攞獎。成功路，充滿荊棘。Bernard自小患血管病，身體衰老得比人快；Witman則自爆金融風暴那年，人生首次失業，一度徬徨不安。
有「政壇型男」之稱嘅Bernard，熱心公益，笑容冧爆老中青女性。頒獎禮上，見佢清減咗六、七磅，原來佢近期迷上玩一種名為TRX運動帶玩意，出差不忘健身，Bernard話，擴胸收腹一流。泰國水災嚴峻，喺當地有唔少家族生意嘅佢，日前返過「家鄉」。
泰保險生意賠千萬港元
Bernard話，曼谷水浸已退卻唔少，可惜遊客嚇到雞飛狗走，親戚經營嘅酒店，入住率唔夠五成。而家族營運嘅保險生意，亦要面對大額索償，預算至少賠償一千萬港元。雖然唔見錢，Bernard話最緊要身體健康，錢財只係身外物。
另一得獎者Witman人緣廣，菁英會創會主席施榮忻、榮譽主席白富鴻及出爐傑青黃傑龍紛到賀。Witman自爆九七金融風暴後，任職的電訊公司大裁員，一夜間由區域經理淪為失業大軍一員，剛購入嘅六百多萬豪宅亦跌價四成，認真當黑，但Witman堅信有明天，僅花五個星期便找到新工，未幾更與友人夾份開公司做老闆。
司徒永富追求簡樸生活
鴻福堂執董司徒永富（Ricky）有份攞獎。雖然做飲食起家，Ricky絕不為食，佢話：「生活勝於飲食，身體勝於衣裳」，追求簡樸生活，日前完成毅行者活動，好有意義喎。
卓妮