政情：陳浩濂靠食晏巡山頂
今屆區議會選舉結果趨向年輕化，好多新面孔誕生，除咗擊敗職工盟李卓人嘅工聯會小花劉桂容外，仲有幫自由黨收復中西區山頂失地嘅新丁陳浩濂（Joseph），呢位後起之秀近日忙於四出謝票，就連其愛駒出賽亦無暇去打氣。Joseph從事金融業相當忙，將來點樣抽時間落區呢？佢話自己喺中環ifc返工，通常會利用食晏時間，揸車去山頂視察環境，同處理居民嘅投訴。
李梓敬黃冰芬分享落選心情
Joseph同阿容喺區選勝出固然開心，但唔係個個首次出戰都報捷，好似自由黨李梓敬同民建聯黃冰芬，同對手票數唔係差好遠。兩人尋日就喺電台節目上分享落選心情，黃冰芬話選舉令佢肥咗，事關每晚九時至十二時要落區企站派傳單，俗稱「消夜站」，派完例必肚餓食消夜，食完無耐又瞓覺，唔肥就假喇。
至於李梓敬，佢話會繼續落區服務居民，四年後捲土重來。