政情：范太葉劉師姐妹鬥幫人
全國人大常委范徐麗泰同新民黨立法會議員葉劉淑儀係中學師姐妹，對好多政策嘅睇法都同聲同氣，尋日佢哋又齊齊出席關社聯盟論壇，不約而同爭住幫中港家庭。話說論壇上有一個港人內地妻子大呻，話自從○三年結婚以來一直攞唔到單程證，次次想攞一年多簽就變人球，搞到個仔成日要陪佢中港兩邊走，又經常斷學，講講下仲忍唔住哽咽。
范太一聽到呢個故事，就即刻話會積極跟進，仲畀咗個電話呢位太太添，叫佢有問題可以打去搵佢喎。葉太見到師姐咁進取，都不甘示弱話：「你可以搵我，除咗范太之外，仲可以搵新民黨，咁啱我個助理就坐喺你前面，你可以問佢攞卡片！」兩位師姐師妹確係同聲同氣。
葉太話，自己中一時已經畀當時身為Prefect（風紀）嘅范太「指導」，當聽到范太希望佢慎重考慮參選時，葉太就好乖巧咁答咗一句：「多謝師姐鼓勵同指導」，真係姊妹情深到你唔信。