中環出更：施榮忻揀奶粉唔信宣傳
消費者委員會喺今期選擇月刊介紹奶粉，聲稱好多奶粉商所標榜嘅好處名過其實，兼且有作大之嫌，搞到好多父母都唔知點揀奶粉好。卓妮日前喺一個活動上見到百仁基金主席施榮忻（Jaime），佢話同太太Jaymee從來都唔信廣告嘅宣傳，最緊要奶粉唔會令囡囡皮膚敏感，食咗腸胃好就得嘞，依家囡囡食緊日本奶粉，但唔容易買到，所以每次要一箱箱咁訂購。
Jaime同Jaymee嘅愛情結晶曉渝，話咁快就十五個月大，眼仔睩睩，皮膚白裏透紅，盡得靚媽咪嘅真傳，而且表情多多，仲向卓妮大送飛吻添。時下唔少父母都絞盡腦汁，幫仔女報讀名校，甚至未出世就報定幼稚園，但Jaime就反其道而行，話順其自然喎，事關佢大女Victoria都循政府派位入讀小一，因為唔想畀大女太大壓力；佢仲話，畀心機讀書嘅話，讀邊間都出色喎。