水務署之前攞咗個「公務員優質服務獎」，又教人如何節省用水，卻原來是搞笑版。事實是，水務署最浪費食水，兼且管理無能，爛到冇人有。
水務署呢幾年來係審計署狠批嘅常客，一年甘過一年。去年先話緊佢監管屋邨水管滲漏不力，估計每年因此滲漏相等於八千個標準泳池嘅食水，涉及水費八千萬元；三年前，又被審計署踢爆水務署用上近二億元開發新嘅客戶服務及發單系統，竟不能以中文地址發出水費單，搞到成千上萬水費單資料出錯，後來又用咗近千萬元補鑊。
嗱嗱嗱！除咗審計署炮轟，申訴專員都睇唔過眼，今年九月，公署話全港約有十四萬個水錶唔準，估計因此計錯市民水費過百萬元。○八年，公署發現水務署唔少抄錶員一味靠估，全港超過三萬用戶就咁交多咗水費，涉款近四千萬元。
講開真係幾把火！水務署署長馬利德監管不善，彰彰明甚！今次審計署炮轟水務署長期漠視市民非法偷水，有啲水錶爛到阿水爸都認唔到，之不過，水務署一眾官老爺就係睇唔到，當冇事發生，估計去年即因此流失食水近三千五百萬立方米，變相令公帑少收水費一億六千萬元！
馬利德事後表示要加強水錶監察，又要關注偷水問題。總之，賊過興兵，又有何用？計老朽話，水務署管治無能，爛到根部，醫番都嘥藥費。語云「端人碗，受人管」，何以馬利德完全不受管？爛成咁，下台吧！