政情：吳揪得捱壞入廠留醫
工聯會理事長吳秋北（吳揪得）○九年以新鮮面孔當選為工聯會歷屆最年輕嘅理事長，一向予人做嘢勤力嘅印象，佢啱啱先統籌完區議會選舉，跟住仲要負責埋呢兩個星期喺黃大仙同屯門舉行嘅特惠購物周，認真辛苦。唔知係咪因為操勞得滯，吳揪得尋日突然急病入院，仲要留院觀察添，實在令人憂心。
尋日吳揪得原先要出席下午最低工資委員會搞嘅諮詢會，但開會前佢突然發現身體有啲唔妥，於是就去醫院睇病，醫生就勸喻佢留院一至兩日，搞到工聯會要臨時取消出席諮詢會。話時話，工聯會相當重視最低工資水平，所以今次工聯會缺席諮詢會，相信係迫不得已下先至咁做。
我哋問過工聯會立法會議員王國興，佢就話唔知乜事。至於另一工聯會議員潘佩璆就話，早兩日先至見過吳揪得，當時仲覺得佢好生猛，點都無諗過佢過兩日就要入院留醫，話希望佢可以快啲好番，盡快重返工作崗位喎。