政情：楊孝華「選」特首惹誤會
正當特首選舉進入大直路之際，日前忽然殺出另一位疑似特首候選人，佢就係旅遊界前立法會議員楊孝華（Howard），而且仲印埋宣傳單張添！不過，仔細睇吓佢張宣傳單張，就發現原來Howard只係參選特首選舉委員會旅遊界別選委，並唔係真係諗住參選特首。
之所以有選特首嘅聯想，係因為Howard嘅宣傳單張大大隻字寫住「我參選」同埋「選特首」，但中間就夾住個細細嘅「去」字，即係佢參選選委去選特首咁解，加上單張上仲寫住「I am running」，寫到似層層咁，驟眼睇真係以為佢去選特首，夠晒創意。
下月十一日，各界別就會投票選出千二名選委，各界別候選人已經開始行動，出盡法寶吸引選民注意。社福界嘅怒火七星就製作一本精美嘅「社工秘笈」，高呼「助人難自助，社工需十卜」。另一個有份參選嘅「社福動力」就大打政治牌，話社福界唔一定要係泛民嘅票倉，聲稱好唔甘心社福界嘅民意被騎劫，先至出來參選喎，認真立場鮮明。