政情：區會選委建制派趕絕泛民
今年特首選舉委員會界別分組選舉選戰異常激烈，泛民主派雖然派出近二百人參選，但有分析話泛民要攞到一百五十席參選特首入場券，情況並唔樂觀。而隨着泛民喺區議會選舉大敗，加上建制派積極協調，估計喺今日開始接受提名嘅兩個選委會區議會界別，泛民極可能一席都攞唔到。為免有建制派區議員唔生性投錯票，據聞政府私下搞咗個補習班，教佢哋點樣填寫選票，令泛民連偷雞嘅機會都冇！
今屆千二人特首選委會中，有一百二十一個區議員席位，其中五十九席來自九個港島區同九龍區嘅區議會，六十二席來自九個新界區嘅區議會，四百多名喺啱啱結束嘅區選中當選嘅區議員，都有權投票同報名參選。但由於泛民喺區選大敗，可以出選嘅區議員已經較建制派少一截，再加上該兩個界別採取全票制，令泛民想按比例攞番十零廿席嘅機會都冇。
據可靠消息透露，建制派日前已成功協調港九各區議會界別選委名單，其中港島四個區會分到廿四席，而九龍五個區會就會有三十五席。消息仲話，今次係按各建制黨派所得嘅區議員議席數量分配，所以唔理大小政團或獨立建制派都「人人有份」，但泛民就當然一席都分唔到。
新界未傾掂數
不過，消息亦指繼新界鄉議局選委界別協調失敗，出現三十人爭廿八席嘅意外局面後，新界各區議會界別選委名單協調亦出現困難，到依家仲未「傾掂數」，如果最後真係協調失敗，呢個可能係泛民嘅最後曙光。不過泛民喺九個新界區會，全部加埋原來都只佔約五十席，睇嚟都係神仙難救。
選委會選舉係採用全票制，比區議會嘅單議席單票制，或者立法會嘅名單比例代表制都難玩好多，例如新界區會界別有六十二席，每名選票就要喺選票剔足六十二個名，剔多剔少都會變成廢票。有傳民政事務署擔心部分建制派區議員唔識投票，已經秘密教導佢哋乜嘢叫做全票制，切勿亂咁剔浪費選票。