中環出更：盛智文搵料重建老蘭地標
有「蘭桂坊之父」稱號嘅海洋公園主席盛智文，做事親力親為、幹勁十足，繼早前搞搞新意思，同觀瀾湖合作喺海南島海口打造高爾夫球大型度假旅遊區後，又埋首發展中環蘭桂坊新地標「加州大廈」（California Tower）。卓妮日前就見盛智文同疑似設計師暢遊中環街道搵建築材料。
研究大廈外牆
當日盛智文以一貫休閒風格打扮現身皇后大道中，身邊仲有位疑似設計師嘅男士同行，期間兩人有講有笑。佢哋一邊行一邊研究街道兩旁大廈嘅外牆裝修及物料，盛智文仲好落力咁對住啲大廈指手畫腳。行到干諾道中五十號嘅時候，佢哋停低腳步，盛智文走埋去幢大廈摸幅外牆，似乎對隻物料好滿意咁喎。
卓妮上前問盛智文為乜要周圍摸，原來佢話要為旗下嘅蘭桂坊加州大廈重建，搜羅大廈外牆材料。兩人努力完後，出名識歎嘅盛智文不忘走入大廈旁邊間咖啡店買番杯咖啡輕鬆吓，邊飲邊離開。
加州大廈預計喺一年後落成，樓高廿八層，地下至二十樓會有酒吧同餐廳，樓上就有辦公室同髮廊，而盛智文個office就喺頂樓，有居高臨下之勢。
卓妮