觀塘海濱花園甩皮甩骨

匯演效果失靈　遊人掃興

觀塘海濱花園第一期去年初啟用，多用途廣場每晚六時至十時，每隔半小時會放演「燈光音樂匯演」，燈飾會隨着音樂而變色閃動，地面亦會噴出水霧，締造「夢幻」景色。

最近「夢幻」效果突然失色，原因是廣場內的水霧功能已停用。「其他人話半個鐘噴一次，點知等極都係無，又沒有貼損壞告示，搞到我得個等字，真掃興！」專程到海濱花園欣賞匯演的阿風批評，當局無貼出損壞告示，令遊人掃興。

放大圖片	海濱長廊內的燈柱遭人惡意破壞，其中一支更爛至「連根拔起」。（馮溢華攝）

另外，海濱花園內一條長約二百米、由木板鋪成的海濱長廊上逾三十支燈柱全部爛蓉蓉，大部分被綁上「危險」膠帶，約十支燈連燈罩也不翼而飛，只以白色膠袋包裹着，其中一支燈柱更被推倒地上。

「一個月前壞咗，已向康文署匯報，政府做嘢係咁慢，要報上報，又要睇吓有無錢，都唔知幾時先維修？」消息人士更表示，早前見大批夜青到上址流連及大肆破壞。

觀塘區議會主席陳振彬質疑當局甚少巡查及維修：「早前已收到消息話匯演嘅噴霧效果已損壞，但唔知點解康文署無維修，唔應該等咁耐！」

康文署發言人表示，海濱花園斥資一千九百六十萬元興建，強調多用途廣場的水霧效果並非損壞，只是控制噴水的電子時間掣失靈，發現後已即時跟進。另外，燈柱損壞數目較多，工程部門需從海外訂購更多配件，預計下月中旬完成餘下工程。