中環出更：「6條1」生辰 郭羅桂珍開P
逾千對新人喺上周五「六條一」註冊結婚，場面墟冚。原來當日亦係莎莎老闆娘郭羅桂珍（Eleanor）牛一，佢覺得今年意頭十足，於是喺灣仔會展大搞生日Party。身為保良總理嘅Eleanor，捐出當日賀禮做善事，夠晒善心。
Eleanor搞生日派對，城中名人紛到賀。老公郭少明及仔女齊出動迎賓，留學英國嘅兒子更專程返港。Eleanor心情靚爆，穿起閃令令晚裝裙滿場飛，睇落佢瘦咗又靚咗，唔通刻意為今次Party減磅？
為博太太一笑，郭少明攬住太太齊跳社交舞，三個仔女亦輪流上台大唱冧歌，博得觀眾連場掌聲。Eleanor喺保良人緣廣，副主席梁寶珠、總理杜振源、陳細潔及陳正欣等都有撐場。政商界老友就有自由黨榮譽主席田北俊、利孝和夫人、媽打李麗娟同胞妹李桂蘭、行會成員梁智鴻夫婦等，星光熠熠。
雷禮權銀光Look夠搶鏡
數最搶鏡賓客，九巴後人雷禮權就最矚目，William穿起一襲銀光閃閃西裝，配埋銀手袋、粗銀鏈及一副螢光紅眼鏡，十足未來戰士，成晚搶晒鏡。據講佢套西裝係搵香港裁縫訂製，布料則購自美國，估唔到簡單剪裁都有驚艷效果。