中環出更：工總頒獎禮 黃鐵城膺傑出工業家
今年「傑出工業家獎」尋晚誕生。從事玩具業四十年嘅鎮泰有限公司董事長黃鐵城獲獎。「青年工業家獎」四位得獎者亦同日出爐，包括有「聖誕樹王子」之稱嘅鄭家恒（Lewis）及「紙品公主」馬家慧（Rebecca）。
兩個獎都係工業界最高殊榮，工業總會尋晚喺會展筵開多席慶祝，城中工業家雲集。黃鐵城係現任中國玩具協會名譽會長，「食力」毋庸置疑。回想當年，原來佢想做公務員，想話趁早養家，後來獲助學金入讀工專，改寫人生。如今事業有成，佢話全靠太太四十年來風雨同路，真係冧爆。
鄭家恒馬家慧當選青年工業家
幾位青年工業家都才華洋溢，只有三十五歲嘅Lewis，係史丹福大學工商管理系高材生，現任保利高集團行政總裁。Lewis自爆爺爺做膠花起家，到爸爸嗰代生產聖誕樹，現時係全球聖誕樹製造商龍頭，得獎實至名歸。
至於芳齡只有三十二歲嘅Rebecca，係唯一得獎嘅女性。Rebecca現任力嘉集團（中國）總經理，為唔少家電品牌生產紙品。留學澳洲嘅佢，十年前返中國打理紙品廠時，因為唔識得「煲冬瓜」，一度搞到蝦碌百出。
另外兩位青年工業家得主，仲有從事貴金屬業務嘅黃健華及製衣才俊張益麟。除咗培育新人，工總新橋多多，行政總裁邱達宏話，明年一月將首次舉辦「重慶香港購物節」，帶香港品牌殺入中國內銷市場，已有卅間香港公司報名。所以話，發達一定要夠主動！
卓妮