政情：嫻姐「科管」身體搵人鬧
從政人士經常都捱更抵夜，好易捱壞身體，好似一向為勞工權益打拚嘅工聯會副會長陳婉嫻，早年曾經患上乳癌，加上政府官員都對利民政策愛理不理，所以有時搞到嫻姐好勞氣。好多街坊見到嫻姐重出江湖參加黃大仙區議會選舉，雖然最終以票后姿態當選，但都好關心嫻姐嘅健康狀況，叫嫻姐早啲返屋企瞓覺，但班街坊有所不知，原來嫻姐已經奉行「科學管理」方法照顧身體。
現年六十多歲嘅嫻姐話，所謂「科學管理」照顧身體，簡而言之主要係醫生叫佢注意四件事，第一要有足夠睡眠，其次係適當運動，仲要有良好飲食，最後係做好情緒管理。嫻姐笑言，自己頭三樣嘢都做到，反而情緒管理就做得唔係幾好，所以希望第時可以「適當哋鬧人」喎。話時話，好多嘢都係有因果，如果唔係啲官做得差都間接幫咗嫻姐，嫻姐愈係大動肝火鬧高官，人氣就愈盛。