政情：新大樓豆腐渣 賴晒承辦商
立法會新大樓開咗咁耐，發現多處有甩漏情況，秘書長吳文華（Pauline）尋日係咁呻，話畀承辦商激死，因為好多嘢都交唔足貨，要立法會自己執漏，有時整錯咗，仲要立法會畀貴啲先肯整過。
好似會議廳同前廳嘅招牌，字樣已由白色換上金漆。Pauline話，由於早前承辦商未交到「金漆招牌」，惟有使用塑膠字體頂上，先至最終鬧出招牌「甩頭甩骨」嘅笑料，嚴重影響立法會形象，依家換上金屬招牌，真係打風都打唔甩。
另外，大獲好評嘅管事（Steward）職員，原來月薪有一萬四千元，雖然薪酬算高，但Pauline話，管事最少有五年餐飲業經驗，除咗要面試外，仲要技能測試，就係要識沖靚咖啡同烘多士喇，只要呢兩樣手勢好，整其他嘢食都唔差得去邊喎。
至於中環舊立法會大樓，下星期五正式交畀司法機構接管，但由於該處係歷史古蹟，翻新有一定難度，預計二○一四年至一五年先可以完工。