政情：CY：欽點特首講法侮辱選委
選委會界別分組選舉提名結束，離下月投票選出千二名選委嘅日子愈嚟愈近，究竟「阿爺」有冇欽點佢心目中嘅人選，好快就知道。但正在備選特首嘅前行政會議召集人梁振英（CY）尋日就義正詞嚴話：「欽點呢個講法，真係侮辱咗千二名選委，簡直係陷中央於不義。」
對於今次特首選舉，不時有人推測「阿爺」嘅諗法，又話有欽點，未必係真正嘅選舉。CY尋日黃昏出席安溪同鄉會就職禮時，專登向記者放話，話明年特首選舉，係比併能力、理念、政綱，唔係選自己朋友。
CY仲話，選委咁踴躍參選，證明佢哋好重視手中一票，絕對有個人思想。如果呢個時候，仲有人話中央已經欽點人選，只係做場戲畀大家睇，咁講法真係侮辱咗千二名選委。
唐唐蘭桂坊飲利賓納
至於唐唐，就喺蘭桂坊同自由黨一班青年對話，佢以利賓納代酒，費事畀人當係選舉宣傳，要計開支。期間唐唐亦暗批CY，話行政會議成員應該同政府上下一心、同心協力。唐唐今日首次會見傳媒，地點係藝術中心，唔知會唔會畀傳媒任問唔嬲呢？