政情：蘇菲梁漏報利益放生自己

事緣今年四月底及五月初，有市民向立法會投訴，指蘇菲梁、霍震霆（Tim霍）、經濟動力梁君彥、「金勞詹」詹培忠、黃宜弘及民建聯葉國謙，共六位議員漏報董事利益。蘇菲梁聲稱自己無心之失、黃宜弘就賴員工疏忽、梁君彥直頭話自己同助理都係疏忽所致。議監會查咗成半年，除咗查明葉國謙唔算漏報之外，針對其餘五位議員投訴全部成立，但竟然唔作處分！

議監會副主席劉慧卿話，五個議員既非蓄意漏報，亦無證據顯示佢哋嘅違規同議員角色有利益衝突，所以唔作處分，純粹大聲鬧吓佢哋「有欠謹慎」、「不符合公眾對立法會議員嘅合理期望」，將來要加倍小心，唔能夠將申報嘅責任推晒畀助理了事，至於身為議監會主席嘅蘇菲梁「理應更為警覺」。

其實議監會本身就係議員自己查自己，好似前年高鐵爭議後，專業會議石禮謙（大舊石）又係被投訴漏報利益，結果查完一輪，議監會決定提動議訓誡大舊石，但動議被否決，換言之同樣放生咗大舊石，證明議監會根本係無牙老虎。

黃宜弘得戚 叫改善議事規則

難怪報告出台後，黃宜弘好得戚話，議監會花咁多人、咁多時間調查，多少有啲浪費喎，況且佢漏報嘅利益不涉及公眾利益，議事規則係咪要改善吓呢？

身為議監會委員嘅黃成智就略帶激動話，議員申報求求其其、錯漏百出，難以令市民信服，尤其是蘇菲梁，佢有份查完前排經濟動力劉皇發漏報利益，轉個頭自己又犯同樣錯誤，令人質疑佢仲適唔適合做主席，所以佢會去信蘇菲梁，勸對方做番委員，而蘇菲梁就話交番畀委員會決定。卿姐就補充，有啲外國議會由獨立專員調查議員利益衝突，議員只係從旁監察，立法會秘書處可以睇睇外國點做喎。