中環出更：楊受成捐千萬 河北建老年中心
英皇集團主席楊受成上周六喺北京釣魚台國賓館舉行嘅發布會上，宣布由楊受成慈善基金捐資一千萬元人民幣，於河北省順平縣興建「楊受成（中國‧順平）關愛老年中心」。
楊受成○九年開始，就捐助當地設立該區首座由縣政府直接管理嘅「楊受成慈善基金（順平）老年服務中心」，主要照顧年老無依嘅長者。國家主席胡錦濤曾經喺今年農曆年除夕時親自造訪中心，呢件事仲喺年初一晚作為中央電視台用作新聞聯播節目嘅頭條新聞添。國家對該中心高度重視同肯定，引嚟全國各地相關單位相繼學習參觀。
新中心將會起喺「楊受成慈善基金（順平）老年服務中心」旁邊，面積一點四五萬平方米，設有六百五十張床位，將面向全國有需要嘅老年人，進一步推動關愛長者精神，深化照顧服務。呢項善舉已獲國家民政部嘅大力支持，部長李立國早前仲為新中心親筆題名添。
楊受成話，得到國家領導人認同佢嘅工作，感到非常光榮同鼓舞，希望自己一點綿力能喚起更多人關注，共同做好國家嘅老年服務。