中環出更：肥龍面凹暴瘦似患病
出名愛美食、堅持唔做運動嘅前政務司司長許仕仁（肥龍）上個星期先有傳佢拍賣愛駒「各適其適」，之後工商銀行又宣布佢基於個人理由唔出任獨立非執董一職，令外界懷疑肥龍健康欠佳。卓妮早兩日遇到肥龍，見佢瘦咗成個碼，肥龍變瘦龍，成塊面都凹晒，睇嚟傳聞空穴來風，未必無因。
上星期六，卓妮遇到肥龍同佢太太羅美美一齊坐住架凌治房車去灣仔世紀香港酒店嘅老上海飯店食晏。司機放低佢哋之後，肥龍太太就自己入去飯店先，肥龍就一支公行去對面馬路嘅便利店買嘢。
衣不稱身 精神尚可
肥龍喺便利店逗留咗五分鐘，就拎住個白膠袋行出嚟，好明顯係無自備購物袋，買嘢要畀多五毫子。當日嘅天氣明明都唔係凍，周圍嘅人都着短袖衫，肥龍就着住套西裝、白恤衫，仲要加件V領冷衫。
卓妮見佢瘦咗成個碼，啲衫明顯有鬆位，而且原本有雙下巴嘅佢仲瘦到成塊面都凹晒。佢全程耷低頭，但精神尚可。
肥龍之後返飯店同太太食飯，食咗一個鐘左右。佢出嚟時原本拎住嘅白膠袋入面就多咗個飯盒，唔知係唔係食唔晒要拎走。
睇番網上資料，老上海飯店馳名大閘蟹同蟹粉做嘅菜餚，適逢蟹季，唔通佢抵受唔住引誘？
卓妮聽人講，一直支持唐英年選特首嘅肥龍最近已經好少參與助選工作。早喺一個月前有政界人士更加傳佢身患重病，又話佢通過波仔，上個星期有傳佢拍賣愛駒同唔做工行獨立非執董，睇嚟肥龍身體有問題呢個傳聞都有幾分真。
卓妮