政情：洪為民唔急換iPhone 4S
iPhone 4S日前喺香港開售，即時掀起炒風，不過身為IT人嘅菁英會主席洪為民（Witman）就話唔心急換機，以免助長炒風。佢仲透露為咗囝囝學業着想免得佢分心，囝囝依家仲係用緊一部冇得上網嘅非智能老爺手機。為人父母嘅真係用心良苦，幾時都為仔女着想。
Witman用緊iPhone 4，稍後都會用公司計劃更換iPhone 4S，佢強調自己唔心急去換機，因為IT嘅嘢好難無止境咁去追，唔認同要刻意趕上潮流先證明到自己係IT人。況且佢認為IT嘅嘢唔值得炒同收藏，唔似得二千年普洱茶真係冇咗就冇喎！
Witman又透露，佢囝囝依家仲用緊冇得上網嘅非智能手機，即係只可以打出打入已經夠用，如果真係要上網搵資料，大可返到屋企先上網，相信此舉可以避免囝囝分心喎，所以即使佢換咗iPhone 4S，亦唔會留番部iPhone 4畀囝囝。Witman對囝囝一片苦心，唔知囝囝又從中領略到幾多呢？