政情：白富鴻輸區選賺得經驗
區議會選舉曲終人散，今年有好多新面孔加入議會，但亦有唔少有實力嘅參選人敗北，好似前菁英會主席白富鴻（Frank）咁，據聞好多街坊都替佢落敗感到不值，但見慣世面嘅Frank並冇因而氣餒，反指選舉就係有贏有輸，又事先張揚會繼續原區服務市民，希望四年後捲土重來。
本身係老闆級嘅Frank首度參選中西區衞城選區，早兩年前已開始落區做各類社區工作，包括成立中西區半山社區事務促進會，最後力戰下以四百多票之差落敗於盤據區內多年嘅民主黨鄭麗琼，都算係對支持者有所交代。
Frank形容，今次選舉係好好嘅人生經驗，幾多錢都買唔到，好似自己早前落區謝票時，有市民話有投票支持佢，對佢最後落敗感到失望，但佢坦言選舉就係有贏有輸，況且今次投票率亦較以往提高，反映仍有空間推動更多選民出來投票，佢會繼續努力服務市民。鄭麗琼未來四年真係要醒醒定定，否則下屆區選唔好怪啲街坊變心支持其他人喇！