政情：范太棄選特首今日揭盅？
本報幾日前獨家報道全國人大常委范徐麗泰好可能畀中央勸退，並會喺今日交代放棄參選特首事宜。直到尋日傍晚，范太忽然通知傳媒，話今日三點鐘會開記者會，莫非真係好似我哋所講，范太會宣布棄選特首？其實范太尋日早上出席教聯座談會時，已交代會喺月底前拍板選唔選特首，但點知幾個鐘頭後忽然宣布會喺今日開記者會，認真峰迴路轉。
幾個疑似候選人尋日紛紛出席教育座談會，范太同新民黨主席葉劉淑儀出席咗教聯座談會。對於前港區人大代表吳康民日前指范太近月民望下跌，應有自知之明，范太笑住回應話，康叔分析甚有道理，佢嘅民望確實有下滑迹象，因參選立場搖擺不定先至令市民覺得佢前言不對後語。范太仲話已暫停同政商界見面，要留番啲時間寫文章喎。另外，范太同葉太均表示，未來特首有責任就《基本法》第二十三條進行立法工作，不能「避得就避」。范太形容，二十三條嘅立法任務艱巨，但政府要考慮香港當時的環境，不能勉強。
唐唐讚能幹 CY唔評論
出席另一個教育座談會嘅唐英年就話，范太係一個好能幹、佢好尊重嘅朋友，會尊重范太嘅個人決定，又話自己都會盡快做決定咁話。至於「備選」已久嘅梁振英（CY）就唔評論范太嘅言論，但佢出席一個國民教育講座時話，國家發展未必盡如人意，叫大家要接受國家嘅優、缺點咁話。
