中環出更：吳傑莊開班 擴闊IT人生活
講起資訊科技（IT）界人士，相信好多IT人都係由朝到晚對住部零感情嘅電腦工作，都咪話唔悶。創新專業聯盟總召集人、高鋒創投主席吳傑莊（Johnny）話，其實IT人閒時都識享受，識飲識食，佢年前聯同電腦學會嘅一班前任會長成立咗個「IT Fans Club」，帶會員一齊吃喝玩樂。
品酒試菜行山投資
Johnny話，IT人平日返工已經好大壓力，所以IT Fans Club會搞吓品酒班、試新菜、行山、投資等興趣班，讓大家調劑生活，嚟緊仲會開攝影班添，照顧晒大家嘅味蕾、健康同荷包。問Johnny有乜嗜好，佢自言好注重健康，每逢周末都會同太太去行山，順便拍吓拖，遠眺山下風光，心曠神怡喎。
Johnny服務IT業界十年，做過電腦學會副會長，回顧香港回歸十五年，佢話本港經濟面臨轉型，民怨愈來愈多，皆因行業太窄，所以創新專業聯盟正匯聚法律、醫學、會計、IT同地產界人士，嘗試畀唔同行業合作研發新行業。