政情：李雲迪太忙唔知港府派錢
鋼琴王子李雲迪又開演奏會，今次只演一場，賀中國銀行明年一百歲生日。佢尋日西裝骨骨現身記者會，講起開騷就好high，但提到居港年資足夠領取政府派發六千蚊未，雲迪就一臉茫然話：「未有時間了解！」
李雲迪○六年以首批優才身份進身港人之列，計落未夠七年攞到永久居民身份，所以唔夠資格攞六千蚊。不過，入境處發言人話，如果李雲迪申請優才計劃前，以工作簽證身份居港，前後住夠七年嘅話，一樣可以攞六千蚊喎。
區區六千蚊，鋼琴王子似乎唔多志在，笑言未有時間了解申請資格同程序，如果真係攞到，會捐出嚟支持環保喎。佢話，近年巡迴世界各地演出，意識到全球暖化問題愈嚟愈嚴重，呼籲大家珍惜地球咁話。
會展開騷 吹中國風
今次演奏會名為《紅色‧浪漫》，將於十二月廿九日喺會展舉行。首次登陸會展舞台，雲迪話心情興奮，將破天荒採用三百六十度旋轉舞台。
今次唔再主打蕭邦作品，反而大玩中國風，演繹《黃河》、《在那遙遠的地方》等多首中國經典名曲。雲迪話，希望將中國音樂帶到全世界喎。