渠蓋「食」轆靠害輪椅客

馬鞍山游泳池、圖書館及運動場對出設有一公園，依靠輪椅代步的王小姐每次途經上址時，均會遇上重重障礙。王指公園內設有多條排水道，覆蓋排水道的渠蓋卻有闊逾一吋（廿七毫米）的罅隙，輪椅極易被絆倒，每次經過均步步為營，「去到邊都要經過嗰排渠蓋，避都避唔到，條罅又闊，輪椅前轆比較細，成日都會戟住條罅！」

差啲成個人飛咗出嚟

事實上，王早前途經時便險告發生意外，幸獲途人協助才避過一劫，「每次我經過渠蓋都已經打斜過，但嗰日趕時間，點知一打直過，前轆就畀渠蓋戟住，仲差啲成個人飛咗出嚟，真係好危險！」王指除傷殘人士外，就連嬰兒車及手拉車均出現相同問題，不滿康文署一直無視問題，「康文署根本冇諗過公眾嘅需要，反而要我哋去將就佢哋整出嚟嘅問題設施，點解明知有問題都唔去改善？」

不少使用手拉車的市民途經時都步步為營，擔心車輪攝入罅隙。	渠蓋闊二十七毫米，逾一吋長，康文署承認問題，但拒絕即時更換。	輪椅前輪較小，行經渠蓋時易「攝入罅」。

改善工程要等到明年中

康文署發言人承認，有關渠蓋已設置逾十年，接獲本報轉介後，已即時跟建築署商討更換事宜。

發言人指出，經商議之後，建築署計劃明年年中改善上址三個場館的無障礙通道工程，屆時會按照屋宇署於二○○八年推出的《設計手冊：暢通無阻的通道2008》（下稱設計手冊），為排水道更換符合設計手冊中建議的排水道渠蓋規格，即渠蓋上或兩渠蓋間任何孔洞的尺寸將不逾二十毫米。

「明知條渠已經錯咗十年，仲要等到出年先改，政府係咪又要等到有人出事先會做嘢？」無障礙設施關注組發言人梁球坦言，對康文署不負責任的回覆、以及未能即時提出改善的做法均難以接受。

梁又說，屋宇署推出的設計手冊只屬建議性質，並無任何約束力，致令各部門即使發現問題仍「大歎慢板」，未有即時作出改善，「個設計手冊分開『必須做』同『建議做』兩部分，因為政府部門可以豁免，好多時就唔肯跟足做，最終受害嘅都係市民！」