我哋日前報道過，北區四個鄉事委員會喺今屆區議會選舉完全唔畀面民建聯（民記），雙方喺多個選區正面對撼，誓要爭一日長短。不過，話口未完，北區四個鄉委會尋日就喺報章刊登聯署廣告，強調同民記合作無間、理念一致，期望將來繼續同民記合作創造和諧美好社區喎。突然間和好，到底當中有乜嘢內情呢？
我哋尋日搵過上水鄉事委員會主席侯志強，佢承認個廣告係由佢哋出面刊登嘅，但就不願多談刊登嘅理由，佢話：「總之我哋繼續做好自己事，其他嘢就唔好講喇。」侯主席平時為人率直豪爽，今次連佢都支吾以對，莫非有人心胸狹窄走去告狀，以致下令要鄉事派噤若寒蟬？
無論點都好啦，北區鄉事派同民記對壘已成定局，要協調或撳人就下屆請早，雖然雙方強調唔係內訌，但競爭一定少不免架，正所謂落場無父子，候選人愈戮力、做得愈起勁，得益嘅始終都係一眾市民。