中環出更：黃楚權樂做愛妻「御用閒人」
國泰航空企業事務董事莊偉茵（Quince）活躍於社交界，工作繁忙之餘又要夾Band做善事，放喺屋企嘅時間自然唔夠使。好彩十幾年嚟有老公黃楚權（Adam）專心喺屋企湊仔煮飯，做個稱職嘅「家庭主夫」。好多大男人接受唔到男主內、女主外，難得Adam睇得好豁達，仲印咗張好特別嘅卡片，自稱係老婆嘅「御用閒人」。
卡片隱藏愛的宣言
卓妮日前喺個酒會見到Adam夫婦，兩人笑容滿面，十分合拍。Adam派咗張寫住四句人生哲理嘅卡片，上面寫住：「御人御物雖御心，用心用性更用情，閒情閒身不閒志，人志人笑皆人妒。」卓妮諗住同佢傾吓做人處事嘅心得啦，點知佢學足電影《唐伯虎點秋香》中唐伯虎寫嘅「我為秋香」賣身契，笑稱四句哲理要打橫讀，於是出咗「御用閒人」四個字喇！
Adam話，佢九一至九六年曾經喺大慈善家方潤華嘅協成行工作，仲參與過協成行舊版Logo嘅設計。後來佢同太太覺得兩個仔年紀仲細，唔可以兩公婆都咁忙，於是就決定由老公扮演湊仔公角色。日日喺廚房練功，Adam終於練就一身好手勢，做豬肉菜式最出色，尤其是懷舊菜最啱Quince胃口，至愛梅菜扣肉。至於愛心靚湯就首推茶樹菇紅蘿蔔煲豬軟骨湯，回味無窮。