中環出更：品酒師推介香檳配膶腸
近年飲紅酒嘅人愈嚟愈多，有冇諗過，每一道中菜亦可以搵到一隻絕配嘅葡萄酒？世界最高排名華人品酒師鄺英志（Peter），日前就同灣仔瑞安中心鴻星酒家嘅星級廚師龍哥，合作搞一場美酒晚宴。Peter細心為每道佳餚配襯一款美酒，食到大家讚不絕口。當中一款白汁芝士焗蟹蓋，配上○八年法國一級靚白酒，成為當晚最合襯嘅焦點。
當晚聞香前來嘅食客過百人，唔少係紅酒專家，包括美食家韋基舜、黃雅歷等，仲有從事紅酒買賣嘅潮青之友余秋偉。龍哥炮製咗多款招牌菜，由頭盤五小碟到秘製燒雞、孜然羊架等，Peter就即場教路如何配搭法國紅酒、白酒及香檳。當中頭盤嘅炭燒膶腸、煙熏鴨胸係極傳統嘅中菜，但係佐以Champagne Veuve Doussot NV法國香檳，入口甘香，令眾人驚嘆不已。
白酒襯托焗蟹蓋一絕
講到成晚絕配焦點，首推白汁芝士焗蟹蓋配搭○八年嘅法國白酒Domaine Garnier & Fils Chablis 1er Cru。焗蟹蓋大家就食得多，但估唔到配搭一啖白酒，酒嘅酸味將食物迷人嘅奶油鮮味襯托得極出色，難怪Peter盛讚係當晚盛宴嘅高潮。
中式晚宴一向色香味俱全，為咗令每一道美酒及佳餚擦出至激火花，Peter特登畀大家喘息機會，中途上枱嘅金華火腿靚湯及席尾嘅龍哥炒飯，都冇配酒，畀大家清一清味蕾。一眾食家對Peter嘅好介紹讚不絕口，尤其是佢口才一流、妙語生花，聽到大家未食先醉添！
卓妮