區議會選舉仲有幾日就舉行，選民陸續收到候選人嘅宣傳單張，就發現愈來愈多單張出錯。有沙田希爾頓中心嘅選民投訴，選舉事務處嘅投票通知卡叫屋苑居民去瀝源邨嘅沙田崇真學校投票，但沙田市中心選區候選人衛慶祥嘅宣傳單張竟然叫佢哋去沙田官立中學投票，如果投票日有選民去錯票站投票，要撲場空就唔係咁好啦！
衛慶祥解釋話，因為去年五區補選時，政府曾經更改過啲票站，先至令佢搞錯票站地址，佢話會盡快印過批新單張畀選民；佢嘅同區候選人仲有民建聯曾錦銓。又有市民發現自由黨荃灣麗興區候選人歐銘絲嘅宣傳單張好多錯漏，例如將「候選人」寫咗「侯選人」、「行政長官」寫成「行先政長官」、「中產人士」就漏咗個「中」字等；佢嘅同區候選人仲有人民力量陳素玲及民建聯林琳。
另外，參選灣仔區大坑選區候選人沈四海向我哋投訴，話自己免費郵寄予選民嘅郵件較規定細少少，中環郵政總局竟然拒絕為佢免費郵寄，反向其收取合共七千多元郵費，佢批評此舉明顯打壓獨立候選人，揚言會於日內向選舉事務處作出投訴喎；佢嘅同區候選人仲有民主黨單仲偕、新民黨黃楚峰及人民力量劉嘉鴻。