政情：CY訪教育團體唐唐晤醫學會
疑似特首候選人梁振英（CY）同唐英年（唐唐）尋日繼續落區。CY去咗拜會教育工作者聯會，獲對方送贈「有容乃大」字畫。席間佢被問到點睇青年積極參與政治及過激嘅表達手法，佢斷言唔覺得過激，反而認為青年視一啲保育項目為生命一部分，顯示青年人對香港歸屬感高，好似一隻洗過好多次嘅熊啤啤，青年人視之為生命中一切，但有人話要揼咗佢咁。
CY仲提到香港應否輸出人才問題，佢話如果香港有能力輸出人才，就好應該用呢啲剩餘能力，搞番好本地嘅優質教育，言下之意認為唔應該搞人才輸出。另一邊廂，唐唐尋晚就同醫學會成員食飯，醫學會副會長陳以誠話，呢次會面氣氛融洽，對於聘請海外醫生問題，陳以誠話唐唐以一切都要尊重《基本法》作回應。
最近有傳聞話醫學會打算去信唐唐同CY，要求佢哋就醫管局主席胡定旭應否炒魷表態，但陳以誠聲稱唔係醫學會發信，只係會董謝鴻興自己講嘅啫。