政情：燕窩價波動 許學之淡定
燕窩生意吹冷風，繼早前亞硝酸鹽燕窩事件後，又傳出有不法商人以有害染色物冒充血燕。據聞有商人因擔心後市唔明朗，曾割價掟貨。中藥聯商會永遠名譽會長兼潮屬社團總會主席許學之承認，燕窩零售價曾應聲下跌一成半至二成，經歷前所未有嘅艱難時刻。
究竟燕窩價格有幾波動呢？據聞白燕零售價曾喺短短兩星期內，由每斤一萬元跌至八千多元，而價錢一向硬淨嘅血燕，亦由每斤萬三元，跌至一萬元，跌價近三成。不過，經營參茸藥材多年嘅許學之話，跌價只屬短暫恐慌情緒，隨着聖誕及新年臨近，唔少人仍會買燕窩送禮，價格將「拗腰」反彈。
吳鴻森趁機撈平貨
燕窩價格大上大落，大棧老闆吳鴻森（Sam）都話唔驚，早前趁價格回落時，反而趁機撈平貨。Sam話，部分早前拋貨的燕窩商，眼見不利消息已淡化，近日急急「補貨」，燕窩價迅速大反彈，所以話，有危就有機，最緊要淡定喎。