政情：選委之路 黃家和買大細
自由黨立法會議員張宇人（Tommy）一直喺飲食界呼風喚雨，但一股求變之風下，不少業界都力推香港餐飲聯業協會會長黃家和（Simon）披甲上陣，同Tommy一較高下。有業界人士更力促Simon提早喺年底競逐飲食界選委，同Tommy支持嘅飲食界十七人名單正面交鋒。不過，本身係廠商會常務會董嘅Simon亦可穩穩陣陣循廠商會成為選委，究竟佢會捨易取難，定係捨難取易呢？
立法會選舉將於明年九月舉行，我哋之前講過Simon好大機會挑戰盤據飲食界議席多年嘅Tommy，但據聞Simon同Tommy血戰嘅戲碼或會提早上演。有消息透露，不少業界人士眼見Simon有意參選飲食界，正游說Simon透過參選業界選委，除咗能夠顯示佢服務業界嘅決心，亦可證明喺業界有堅實嘅支持度，為明年落場參選先聲奪人。但亦有業界中人有異議，擔心一旦陰溝裏翻船，或會影響明年參選立法會嘅部署。
據聞Simon因為可以循廠商會進身選委行列，對於參加飲食界選委或多或少感到左右為難。有知情人士透露，雖然Simon決定不報名爭奪廠商會副會長一職，但本身係常務會董嘅Simon喺廠商會過去嘅選舉中，得票屬於名列前茅，廠商會勢必預留一選委席位予對方，所以建議Simon與其左度右度，不如留番喺廠商會出線最十拿九穩。
Simon接受查詢時保持一貫穩陣嘅處事作風，未有透露個人取向，但承認飲食界「臥虎藏龍」，雖然有人更建議由佢提名業界中人參選，但佢相信距離報名期仲有啲時間，可以畀大家醞釀下喎。
業界當選闖立會 成功例子多
還記得○六年選委會選舉，好似資訊科技界嘅譚偉豪、保險界嘅陳健波等都喺業界高票當選，繼而一鼓作氣進身立法會。究竟Simon會蕭規曹隨，效法多個成功例子，定係最終決定走一條自己嘅路，大家就要拭目以待喇！