嬰兒作談判籌碼 女店員不齒
【本報訊】「我近排見過佢幾次啦，佢次次都抱住個女嚟，勢估唔到佢會咁做！」親眼目擊棄嬰經過的麵店女職員，對於今次事件感到十分愕然，認為任何人均不應將女兒當作談判掟煲費的籌碼。
吸引大批途人圍觀
發生狠母棄嬰事件的麵店，位於荃灣鬧市眾安街，行人熙來攘往，期間吸引大批途人駐足圍觀，並議論紛紛，麵店職員更向到訪的記者道出事發經過。
隔壁目擊事發經過的玉器店女店東笑言，類似事情在內地見怪不怪，「內地成日都有發生啦，有啲內地女人嫁嚟香港後發生好多家庭糾紛，邊個啱邊個錯都唔知」。
亦有街坊認為，雖然女嬰母親看似絕情，但祖母亦要負責任，附近光碟店女東主慨嘆，「話晒都係自己個孫，發生咩事都好，梗係抱上手先講啦，依家搞到好似棄嬰咁好陰功呀！」她又說女嬰被女警抱上救護車時都沒有哭鬧，「眼仔睩睩好精靈好乖」。