隆胸奪命醫生認過量麻醉
美少女為男友隆胸送命案昨繼續死因研訊，操刀醫生黃嘉謀自言為減輕病人痛苦，不惜罔顧指引用超標麻醉藥，他直認替女事主注射超過體重所能承受的麻醉藥分量，卻預料不到出現嚴重後果，強調：「唔係我令到啲病人咁，係啲藥物！」協助急救女事主的外科名醫黃樹德則懷疑黃嘉謀將麻醉藥「唔覺意打咗入血管」，令她出現致命藥物反應。
代表死者梁君（廿四歲）家屬的律師，昨繼續盤問黃嘉謀，指他明知梁只重四十二公斤，仍為她注射了以五十公斤作標準的麻醉藥分量；律師指，根據指引，梁的體重只能承受不足三百毫克的麻醉藥，黃卻在手術開始後的短短八分鐘內，分五次為梁注射了逾五百毫克、即至少超標七成的麻醉藥分量，故懷疑黃是「佢（梁）嗌痛就加，根本唔係好理總共打咗幾多」。
「減病人痛苦 無其他方法」
黃嘉謀平靜回應：「以我經驗嚟講係適合，為咗幫病人減輕痛苦我會咁做，可以咁樣用，無其他方法，就算有少少高過安全水平都可以接受，因為唔係一次過打，係分幾次打，有時間可以畀佢分解。」律師指黃此舉是漠視病人意願：「佢都瞓低咗，你一定唔可以同佢講，嗱！我準備幫你打過量麻醉藥嘞，係咪？」黃強調自己尊重指引，卻再遭律師駁斥：「事實證明你嘅經驗係錯Guideline（指引）係啱，如果唔係佢（梁）點會抽筋？」
黃憶述五、六年前曾為病人施用同一種麻醉藥時出現四肢抽搐的毒素反應，他及時給病人氧氣令對方回復正常，毋須送院，故對於梁在無出現任何警告先兆下便陷入缺氧昏迷，是他始料不及。律師聞言搖頭說：「即係你唔理安全水平，試咗病人有咩反應先算？」黃回應：「唔係我令到病人咁，係啲藥物。」
行家質疑唔覺意打入血管
在黃嘉謀樓下診所駐診的外科醫生黃樹德，當日被邀到黃嘉謀的診所協助急救，他見梁上身赤裸躺於手術床，胸口畫了記號，右胸有刀痕，全身抽搐並陷入昏迷狀態；由於他曾遇過類似病例，即時估計是因血液麻醉藥含量過多導致，在救人要緊下，他沒與黃嘉謀討論，事後才向對方說：「多數係唔覺意打入血管啫，所以啲麻醉藥吸得好快。」黃嘉謀只否認有過量用藥。研訊今續。
案件編號：CCDI 447/2010