政情：陳晴湊B 血拼似做賊
聯合國兒童基金香港委員會主席陳晴（Judy）向來公職多多，自從佢生咗個仔之後就更加分身不暇。Judy話，依家冇晒啲時間行街買衫，想「血拼」都搞到好似做賊咁，要等囝囝瞓着咗先可以靜雞雞上網買衫咁話。
餵母乳困身
Judy因為要好好照顧囝囝，搞到冇晒私人時間。皆因佢為咗囝囝身體好，選擇餵母乳，但係就比較困身。
有「公職王」之稱嘅佢依家要開會，都要等囝囝食飽飽，乖乖地瞓着覺，先至偷偷走出去，行街買衫更加係難上加難。
女人為咗買靚衫總會有辦法，但Judy就話自己「好似做賊咁」，要爭分奪秒「偷」時間喺網上購物，睇中即買，甚至搭飛機都唔會錯過空中購物嘅機會喎。雖然係辛苦，但佢一講到囝囝活潑好動，就會開心到見牙唔見眼。