政情：肥胡引清兵入關遇阻力
公立醫院醫生頻頻劈炮唔撈，搞到人手不足，醫院管理局主席胡定旭（肥胡）為咗請醫生都好頭痛，早前諗到聘請有限度註冊嘅海外醫生來港幫手，只要醫務委員會批准，唔使考試就可以行醫，但擔心醫委會委員唔批准，於是再建議將審批權交畀衞生署，結果激嬲好多醫生。香港西醫工會尋日批評肥胡猶如吳三桂引清兵入關，兼且破壞醫委會專業自主權，強烈要求肥胡收回言論。
香港西醫工會最近訪問咗一百九十一位會員，受訪醫生幾乎一面倒反對肥胡嘅言論，唔贊成引入海外醫生解決公立醫院醫生人手荒，更反對將審批醫生執業權由醫委員交畀衞生署，事關呢個係醫生非常堅持嘅專業自主問題，難怪搞到啲醫生咁嬲。西醫工會代表尋日就高舉「醫管主席，三桂本色，罔顧民康，與民為敵」及「外援引入免審核，鑄成大錯誰之過」等標語以示不滿。
香港近年經濟好，好多公立醫院醫生都選擇私人執業，搞到醫生流失率相當嚴重，留低嘅前線醫生就辛苦，日日做到無停手，無得抖又無得升，結果愈走愈多，醫管局惟有請海外醫生幫手。工會會長楊超發話，公立醫院醫生流失皆因醫院工作環境差，工作量又大，醫生做咗好多年都無得升職，咪出嚟開診所搵食囉，所以如果醫管局搞好工作環境，好多前線醫生會留低。
要求須通過考試
其實工會並非反對醫管局聘請海外醫生，係擔心海外醫生水平唔夠，喺公立醫院行醫保障唔到病人健康，要求海外醫生要通過考試先至可以喺香港行醫，唔好搵病人條命嚟較飛。不過，另有講法話本地醫生反對係「保護主義」。
醫管局今次聘請海外醫生，共有一百六十人申請，其中廿九人嘅水平有香港醫學專科學院認可嘅中期考試專科資歷，頭一批約十幾個申請人已安排面試，如果佢哋合適，醫管局就會將佢哋嘅資料交畀醫委會審批，到時委員係咪會批准呢班「外來」醫生執業，就要拭目以待喇。