中環出更：李垂誼開騷挑戰高難度

大提琴拉高音

垂誼樂社每年都會搞一次大型音樂會，今年就請咗波恩貝多芬交響樂團。呢個樂團有成九十幾個成員，仲係首次來港演出。音樂會喺十二月廿九日於文化中心舉行，呢排Trey都奉獻晒所有時間練習。Trey話，佢會同交響樂團嚟一段三重協奏曲，「嗰部分比較高音，但大提琴音比較低，我想克服佢。」

Trey嘅姐姐李垂音都識彈鋼琴，佢話細個經常同Trey、仲有拉小提琴嘅細妹玩三重奏。不過，佢依家要做Trey經理人，又要照顧一對一歲同七歲嘅仔女，都冇時間練琴喎。睇怕依家要睇Trey三姊弟同台演出，難度應該仲高過叫Trey同交響樂團合奏喇。

李垂誼（左）同家姐李垂音細個時成日喺屋企合奏。（馮惠詩攝）

垂誼樂社主席蔡關穎琴（左）最近忙於搞音樂會，旁為樂社名譽顧問羅啟妍。