中環出更：阿松貴州扶貧學識養雞
前財爺梁錦松經常將「授人以魚，不如授人以漁」掛在嘴邊，就連佢做主席嘅國際小母牛香港分會都係鼓勵助人自助嘅精神，向內地貧窮農民送上牲畜及工具以達至自力更生。阿松早前暑假就同太太伏明霞千里迢迢走到貴州，見證小母牛喺當地嘅扶貧成果，親身體驗貧困嘅農村生活，而阿松更喺山區農民身上學識咗養山雞嘅秘訣。
今次貴州之行，隨行嘅仲有國際小母牛香港分會董事葉澍堃（Stephen）、籌委會主席杜振源及成員之一嘅莎莎國際主席郭少明，一齊到貴州白水村探訪。白水村因為地理原因，農作物好難生長，以致農民收入大受影響。阿松於是帶咗白水村一對張氏小兄弟，去探訪接受過小母牛幫助嘅另一位村民張輝，學習點搞生意脫貧。
原來張輝喺小母牛援助下開咗一個山雞場，令收入翻咗一番。張輝同阿松分享養山雞竅門，話說山雞大到咁上下就會打交，所以張輝整副特製眼鏡畀啲雞戴，保護山雞雙眼免受傷害。難得張輝逐步走出貧困，阿松都大感安慰，仲盛讚張輝係十分有智慧嘅企業家，事關依家已經有酒店及餐廳應承包銷或購買張輝飼養嘅山雞。
小兄弟孝心感動小伏
至於已為人母嘅小伏就慨嘆，張氏小兄弟年紀小小，除咗返學之外仲要負責燒柴煮飯、擔水同餵豬等嘅家務，作為一個媽媽，佢見到都覺得心疼，當小兄弟同小伏講，大個之後要畀雙親過舒適嘅生活，小伏更加大受感動。卓妮期望，張氏小兄弟有朝一日都可以好似張輝咁，靠自己嘅力量走出貧困。
卓妮