區議會選舉下月就舉行，各候選人為咗吸引選民眼球，派發嘅單張都別出心裁，等選民記得自己，但有時可能會有反效果。好似最近有單張喺網上熱爆流傳，唔少網民睇完後都一頭霧水。嗰位候選人叫蔡志賢，單張上無厘頭寫住八個字，叫「柴米油鹽、選蔡志賢」，但究竟佢同柴米油鹽有咩關係呢？就仍然係個謎。
報稱係董事總經理嘅蔡志賢，自稱無黨無派，今次參選黃大仙彩虹選區，挑戰當區議員、工聯會莫健榮。原本人氣唔高嘅佢，因為「柴米油鹽」單張而喺網絡人氣急升，但一眾網民到依家都唔明佢想表達乜嘢，因為單張上面除咗佢個樣同個名之外，就只係剩低「柴米油鹽、選蔡志賢」八個大字。
創意極高嘅網民都冇人諗到答案，有人索性話自己唔係姓「柴」，又質疑候選人係咪當選民係「柴米油鹽」，所以惟有唔投佢票喎，到底真正答案係乜，睇嚟得佢自己先知。本報嘗試過搵蔡志賢，但最後都未有回覆。不過，蔡志賢已經贏咗人氣，乜都抵番晒啦！