前任政制及內地事務局局長林瑞麟（林D9）出名口水多過茶，因而被稱作「人肉錄音機」，令市民同記者都相當反感。新任政制局局長譚志源（Raymond）曾經講過，佢嘅個人風格可能同林D9有所不同。尋日Raymond立即展示新人事新作風，以極簡潔嘅用詞同篇幅向立法會講述該局本年度嘅施政綱領，唔囉唆兼夠晒環保。
尋日各政策局紛紛向立法會提交本年度嘅施政綱領，最唔環保嘅繼續係環境局局長邱騰華，成份綱領一共有卅六頁，但內容九成九係舊聞，全無新意，其他政策局亦大多有十至二十頁。
反觀由Raymond領導嘅政制及內地事務局，份施政綱領就只係得五頁咁多，不但係各政策局中最簡短，亦比林D9過去三年嘅七頁、十二頁同十頁為少。希望Raymond除咗文書簡潔之外，講嘢同答問題都切忌長氣同冇料到啦！