政情：葉劉忽然關心天水圍
煲呔曾尋日喺立法會施政報告答問大會上突然發癲，無事搞事咁話立法會議員係黑社會成員，最終搞到大部分泛民議員憤而離場，令到答問大會變成一場九唔搭八河蟹騷。
喺一片和諧氣氛之下，新民黨主席葉劉淑儀仲突然關心天水圍市民嘅生活，令人嘖嘖稱奇。
葉太本身係港島區立法會議員，選民對象一向都係中產同專業人士，對基層嘅生活同關注度往往較少，不過，佢尋日就住施政報告向煲呔曾提問時就一反常態，質問煲呔曾知唔知天水圍八個商場有七間已經畀咗領匯，租金愈加就愈高，小商戶同市民都苦不堪言。前兩日葉太又喺一個討論競爭法嘅草案委員會上，關心領匯搞到天水圍街市賣嘅嘢比其他街市貴。
葉太做乜突然咁關心天水圍？心水清嘅只要睇睇新民黨今屆區議會選舉參選名單自然一清二楚，原來佢哋有一位成員會喺天水圍出選呀，唔怪得知啦。葉太咁上心，唔通係藉提問幫自己友拉票？